Sinopsis:
Filmi “Sekretet” nga regjisori Esat Fejza është historia e zvetënimit, abuzimit, izolimit dhe skutave më të errëta të shpirtit. Kur këto vendosen një mbi një, si gurët e shtëpisë së një familje fatkeqe, ato ndrydhin brenda historitë e copëtuara njerëzore duke marrë trajtën e të fshehtave përvëluese. “Sekretet” flet për ato realitete që nuk duam ti shohim, flet për ato sekrete që nuk shqiptohen dot as me zë të ulët e që na bëjnë të kthejmë kokën në anën tjetër kur i hasim n’udhë. Ndoshta sepse janë shumë të dhimbshme e ndoshta sepse sekrete të tilla na kujtojnë se thellë-thellë as vetë nuk e dimë se ç’jemi në gjendje të bëjmë e deri ku mund të arrijmë. |
